На комеморацијата беше прочитана телеграмата со сочувство до семејството на Маџиров која што ја испрати в.д градоначалникот Костадинов: „Со неверување и чувство на голема тага ја примив жалната вест за прераната смрт на Вашиот син, сопруг и татко, Зоран Маџиров. Преголема е Вашата болка за огромната загубата, но ако заеднички се повикаме на мудроста која вели дека споделената болка е помала болка, тогаш имајте во предвид дека со Вас тагува цела Струмица и цела Македонија. Зоран Маџиров беше исклучително чесен и вреден сограѓанин кој не ја криеше својата огромна љубов кон родната Струмица. Таа Струмица се гордееше со него, бидејќи како вонсериски музички талент, беше врвен репрезент на струмичката и македонската музика и култура во европски и светски рамки. Зоран ќе остане запаметен како врвен перкусионист кој ја пленеше публиката низ сите светски меридијани. Зоран Маџиров е еден од оние кои докажуваат дека големите уметници остануваат бесмртни, дека тие живеат и по нивната смрт. Бидете горди што беше дел од Вас и што бевте дел од него“, стои во телеграмата. Телеграма со сочувство испрати и поранешниот градоначалник на општина Струмица, Зоран Заев. Зоран Маџиров е погребан попладнево на гробиштата во Струмица.