Беше тоа веста која ги растрепери сите македонски души, која ги расплака сите македонски срца. Беше тоа веста која одекна како гром од ведро небо, вест која никој не сакаше да ја прими како вистинита, а беше повистинита од самата верба дека Делчев е бесмртен јунак. Се случи тоа на денешен ден пред 116 години. Се случи тоа на 4. мај 1903 година во селото Баница, Серско. Во спомен на тој злокобен ден, а во чест на најголемиот македонски син, еве сме повторно собрани на струмичкиот плоштад кој го носи името „Гоце Делчев“, еве сме пред еден од најубавите споменици на Делчев во нашава земја, кој е подигнат пред повеќе од четири децении. Тука сме, по којзнае кој пат да му се поклониме на македонскиот великан, да си спомнеме за неговиот живот и дело и да му се заблагодариме за се што стори за нас и за нашата татковина. Тоа Гоце Делчев го заслужува, како ниеден друг лик од македонската историја, рече градоначалникот Јаневски. Во чест на Делчев, членови на рецитаторската секција од домот за деца и млади „Благој Мучето“ рецитираа револуционерна поезија, а беше положено и цвежо цвеќе пред неговиот споменик.