Министерот за локална самоуправа Златко Перински денеска беше во работна посета на општина Струмица во рамките на караванот „Каде што срцето е дома“.

Посетата започна во кабинетот на градоначалникот Петар Јанков каде што разговараа на актуелни теми од работата на локалната самоуправа и новите предизвици со кои се соочува општина Струмица. Градоначалникот Јанков информираше  за тековните и идните развојни проекти на општината, а министерот Перински за клучните активности на Министерството, како и за можностите за поддршка со цел унапредување на квалитетот на живот на граѓаните.

Во однос на распределбата на средствата за проекти како што нагласи и министерот, оваа Влада се води исклучиво врз основа на реалните потреби на граѓаните, а не врз политичка припадност на градоначалникот, па така преку потпрограмата АА за инфраструктурни проекти во општините, Струмица доби 12 проекти во вкупна вредност од 335.482.797 денари.

Градоначалникот Јанков и министерот Перински имаа средба и со претседателот и членовите на Советот на општина Струмица пред кои беше претставен Прирачникот „Патоказ за ефикасно локално управување“, а кој им помага на градоначалниците, советниците и општинската админстрација полесно и поефикасно да ги водат клучните процеси во општините.