Општина Струмица продолжува со реализацијата на планираните активности иако се ближи крајот од буџетската 2018 година. Во изминатиот период се реализираа повеќе градежни зафати како во населените места така и во градот, а денеска заврши и реализацијата на еден поголем зафат, односно, поставување втор слој асфалт на четири улици со вкупна површина од 11 илјади метри квадратни.

Тоа се целата улица „Ката Поцкова“ и три крака кон улицата „Боро Поцков“ и делови од улиците „Ѓорѓи Василев“, „Младинска“ и „11-ти Септември“. Градоначалникот Коста Јаневски присуствуваше на завршните работи на улицата „11-ти Септември“ и рече дека со овој зафат прилично се подобри инфраструктурата во градот. Со оваа тенденција ќе продолжиме и понатаму, се додека временските услови за оваа година ни дозволуваат и секако остануваме на заложбата и во наредната година да продоложиме со такви активности во уште поголем обем. Се движиме според програмите кој што ги диктира буџетот и можностите кој што тој ни ги дава за оваа година. Јас лично сум задоволен како се одвиваат работите, скоро во сите населени места имаше интервенции од овој вид, ако не и буквално во сите, еве и во градот еден добар дел од улиците се реновираат, така што мислам дека ќе има еден виден резултат од тоа што го планиравме и што ни беше во програмите за оваа буџетска година, рече градоначалникот Јаневски. Денеска се асфалтираа и две улици во населеното место Рич, а во наредните денови ќе се асфалтира уште една улица во Раборци и ќе се проширува улицата на влезот во населеното место Попчево.