Локалниот совет за превенција во општина Струмица ја одржа првата работна конференција во новиот состав, а ја водеше градоначалникот Петар Јанков.

На конференцијата присуствуваа поголем број претставници од сите релевантни општински и државни институции, претседателот и членови на Советот и претставници на граѓански здруженија кои расправаа по единствената и главна тема на конференцијата – квалитетот на амбиентниот воздух и мерките и активностите кои се преземени и коишто ќе се преземаат во иднина за да се спречи аерозагадувањето во Струмичката котлина.

Оваа актуелна и сериозна тема за Струмица и струмичани, а иницирана од градоначалникот Петар Јанков, предизвика голем интерес кај учесниците на конференција со бројни дискусии, констатации, забелешки и предлози како да се спречи аерозгадувањето и да се обезбеди здрава животна средина за граѓаните.

-Заеднички заклучок е дека во југоисточниот дел на градот има најголемо загадување и во периодот којшто доаѓа треба да се преземат одредени мерки. Тоа загадување не е ново и во последните години се зголемува и треба да најдеме долгорочно и системско решение. Беа наведени и дел од мерките коишто ќе ги преземеме, како што е субвенционирање на клима инвертери со донации и вклучување на јавните институции во надминувањето на овие проблеми.

Инаку, нашите општински инспектори се секојдневно на терен, вршат вонредни инспекциски надзори во соработка со СВР Струмица и имаат поднесено соодветни пријави, дури и кривична пријава за одредени несовесни граѓани кои вршат загадување и овие надзори на инспекторите ќе продолжат и во следниот период, бидејќи нашата цел е граѓаните да бидат запознати со нашето работење, затоа што ако сакаме да имаме добра и развиена општина, мора да имаме транспарентна општина, рече градоначалникот Јанков.