Општина Струмица ги реконструира детските и спортските игралишта и парковите во населените места со средства од општинскиот буџет од близу 10 милиони денари. Градоначалникот Костадин Костадинов денеска изврши увид во градежните зафати во населеното место Просениково.

-Денеска на мое огромно задоволство со дел од општинската администрација сме на увид во работите во населеното место Просениково каде што практично вршиме реконструкција на трите паркови. Овде, сме сведоци дека имаме зафати и на атмосферската канализација при што ќе поставиме и решетка и го решаваме проблемот по пријави од граѓаните дека при секој пообилен дожд во центарот на селото се собира вода и нема одводнување.

Инаку станува збор за општински проект за кој одвојуваме близу 10 милиони денари, а тоа е ревитализација, реконструкција и рехабилитација на детските и спортските игралишта и на парковите во населените места.

Денеска сме во Просениково со градежни активности, но секако овој проект има за цел да ги реконструира зелените површини и во населените места Дабиле, Куклиш, Рич и секако и во Сачево каде што веќе започнуваме со дел од градежните активности и ќе трае до завршувањето на оваа година.

Од тука пуштам порака дека заедно со општинската администрација, во наредниот период апсолутен фокус ставаме на подобрување на условите на живот и во населените места, оти на почетокот на мојот мандат и пред неговото започнување отворено реков дека богатството на Струмица се сите населени места, рече градоначалникот Костадинов.