Во домот на АРМ денеска се одржа панел дискусија за Оперативниот план за вработување за 2020, со фокус на регионалните и локалните проблеми, предизвици и потреби. Организатор беше министерството за труд и социјална политика, а истата се одржа со поддршка на општина Струмица. Како учесник на панел дискусијата, градоначалникот Коста Јаневски ги информираше присутните за особеностите, визиите, целите и активностите на Локалниот економски социјален совет во општина Струмица, кој е прв во земјава и постои од далечната 2011 па се до денес.
Локалниот економски социјален совет има консултативна и советодавна функција, и разгледува прашања, дава совети, мислења, предлози и препораки до Советот на општината и други органи и институции за одредени прашања од економијата и социјалната сфера, особено за вработувања на младите и и зајакнување на суштинските врски меѓу потребите на пазарот на труд, дефинирани од страна на деловните субјекти, и вештините, квалификациите и знаењата кои младите ги поседуваат, благодарение на образовниот систем низ кој поминале. Развиениот економско-социјален дијалог на локално ниво создава позитивна клима и развивање на односите меѓу економско-социјалните партнери во креирањето на локалните политики кои влијаат стимулирачки за намалување на стапката на невработеност, пораст на животниот стандард и воспоставување социјална правда и социјална кохезија меѓу оние кои бараат работа и оние кои нудат нови работни места. Локалниот економски-социјален совет на општина Струмица преку своите членови ги зема во предвид интересите на сите и со разни активности, проекти и ангажмани, активно учествува во локалните политики поврзани со вработувањето. Притоа напревени се бројни активности кои се во функција на остварување на визијата, мисијата и главните стратешки цели на Локалниот економски-социјален совет. Во тој контекст, Општина Струмица воспоставува ефективен економско-социјален дијалог со цел – подобрување на економската и социјалната положба на граѓаните, со интенција таквиот дијалог континуирано да се негува, интензивира и унапредува, рече градоначалникот Јаневски.
