Овој фестивал е дел од мрежата фестивали на најзначајниот културен настан за млади во светот – „Џифони Експириенс“. Настанот е наменет за средношколци, од прва до четврта година, а е отворен и за учениците-основци, од шесто до деветто одделение. Она што треба да го знаете е фактот дека „Џифони Македонија“ е најдобриот фестивал во рамките на „Џифони Експириенс“, а не така долгата историја на фестивалот вели дека „Џифони Македонија“ е плод на иницијативата на „Џифони Италија“ да се направи фестивал во друга земја, надвор од границите на Италија. Иако филмовите се главен сегмент на овој културен настан, тој сепак претставува повеќе од филмски фестивал затоа што истиот го промовира концептот на издигнување на младите генерации преку дијалог, размислувања, идеи и искуства на младите од различни култури и религии. Фестивалската понуда, освен филмови, предвидува и организирање на работилници поврзани со визуелната уметност и тоа: театар, танц, ликовна уметност и уметност за учениците од основните училишта, како и креативно пишување, анимација, сценарио, филмска маска, костимографија и слично, за учениците од средните училишта. Преку сите овие активности, Џифони во преден план го става влијанието на филмот врз еднаквоста, соработката, пријателството,  љубовта  и позитивната енергија меѓу младите. Искрено се надевам дека сите вие ќе ја почувствувате таа енергија и позитивното влијание на филмот врз вашите млади личности, рече Јаневски.