Градоначалникот Костадин Костадинов денеска беше домаќин на гостите од амбасадата на САД во Република Северна Македонија предводени од г-а Кели Мекејлеб офицер за политички прашања во Амбасадата и нејзините соработници.

На средбата разговараа на повеќе актуелни теми на државно и локално ниво, а посебен акцент беше ставен на предизвиците со коишто се соочуваше и се уште се соочува општина Струмицаво последниот месец, како што се водата за пиење и недобивањето средства за новиот градски пазар од унгарскиот кредит.

Претставниците на Амбасадата се интересираа, а градоначалникот Костадинов детално ги информираше за голготата со водата којашто Општината и ЈПКД „Комуналец“ ја поминаа исклучиво сами и без никаков интерес и поддршка од владините институции иако тие имаат надлежности, како и за тоа дека Струмица остана единствена Општина којашто не само што не доби средства, туку остана и без писмено известување зошто е одбиена од унгарскиот кредит иако и струмичани ќе ја имаат обврската за неговото враќање.

При тоа градоначалникот им ги објасни и причините за подигањето на алармот во ЗЕЛС, а и се заблагодари на г-ѓата Мекејлеб за покажаниот интерес и дадената поддршка на Струмица и струмичани, во време кога тие се соочуваат со сериозни предизвици и сами бараат и наоѓаат решенија за нив.