Тој рече дека ликот на Гоце Делчев и неговото дело секогаш биле и ќе бидат предизвик за сите генерации Македонци, а нам ни преостанува со нашите постапки да заслужиме да бидеме достојни за да се наречеме негови следбеници.Историјата, макар и оваа што засега ни е достапна, доволно говори кој беше Делчев, што беше Делчев, и што мислеше Делчев! Веднаш ќе кажам: Гоце Делчев беше војник на слободата, стратег и професионален револуционер, но истовремено и ум со висока нагласка и капацитет на широчина, со брилијантна визионерска обдареност. Гоце не само што гледаше туку и чекореше кон иднината, крајно претпазлив, но и силно огорчен од се понагласените заграбувачки аспирации од соседните балкански држави, свесен дека светата слободарска борба нема да има само еден единствен одлучен фронт. И дури, според некои негови најблиски соработници, големиот апостол помалку се плашел од вековниот отомански поробувач, експлоататор и угнетувач, одошто од моќта на расколничката ролја на пропагандите на соседите Србија, Грција и Бугарија. Токму затоа, основата на подготвителните организациски активности на ослободителното востание, секогаш ги поставуваше не преден план, задржувањето на единството и јакнењето на националната свест и определба, пламено борејќи се против секој обид за инфилтирање на врховистичкиот вирус во свесното и совесно македонско револуционерно јадро, рече Христов.Во чест на Гоце Делчев, револуционерна поезија рецитираа рецитатори од Домот за деца и млади „Благој Мучето“.