Бања Лука доби принцеза на Орфејски песни од Струмица

На најголемиот регионален фестивал на детска поезија ,,Дечје царство” кој се одржа во Бања Лука, највисоката титула – принцеза на фестивалот и беше доделена на ученичката Васка Ангелова од седмо одделение во општинското основно училиште „Никола Вапцаров” од Струмица. Нејзините песни „Пејзаж на времето”, „Животински оркестар” и ,,Сите сме исти” се објавени во Зборник, а песната „Сите сме исти” триумфира на целиот фестивал.

За успехот на принцезата, заслужна е цела екипа, нејзиниот ментор Наташа Цонева- Лазаревска , која пушти многу песни од деца- таленти од ова основно училиште, Наташа Василева, директорката и општина Струмица, која помогна со финансиски средства да се стигне до прекрасната лулка на детското царство и другарство – Бања Лука. Од илјадници песни испратени од деца од цела Македонија, во финале влегоа само десет, а уште поинтересен е фактот што оваа година по вторпат Васка влезе во финале, минатата, за жал, не успеа да оди, од оправдани причини, но оваа година направи вистински бум пред учесниците од Словенија, Хрватска, Србија, Бугарија, Босна. Васка е дете – феномен.Тоа го заклучија и писателите кои одлучуваа за наградите, Јово Цулиќ, Тоде Николиќ, Урош Вошњаќ и Слободан Станишиќ. Таа освен што пишува поезија, пишува и романи. Веќе го создава вториот роман на англиски јазик. Сите вработени во ООУ,,Никола Вапцаров“ се пресреќни за успехот на Васка Ангелова, принцезата на Орфејските песни.