По досегашните позитивни искуства од соработката со три општини во Грција преку реализација на заеднички проекти со средства од фондовите на ЕУ, со општини од Бугарија, но и од Русија, со општината Електростаљ, листата на збратимени општини, ќе ја прошири и со општината Стрелча од источниот сосед. Денеска во кабинетот на градоначалникот на општина Струмица, Зоран Заев, на средбата со градоначалникот на општина Стрелча, Иван Евстатиев, почна постапката за збратимувањето. Двете општински делегации ги презентираа можностите за соработка и ги дефинираа спортот и културата како области во кои тие можат да дадат најголеми резултати. Во наредниот период, одлуката за збратимување се очекува да биде потврдена  на Советите на двете општини.

Стрелча се наоѓа во областа Пазарџик, во централниот дел на Република Бугарија и е општина која има огромно искуство во подготовка и имплементација на европски проекти.

Оваа општина е препознатлива и по  термоминералните извори и бањи. Делегацијата на општина Стрелча одржа средба и со претставниците на спортските клубови од Струмица на која е постигнат договор, спортските клубови по повластени услови да ги користат спортските терени и здравствените капацитети на Стрелча.