Прв модул од обуката за инклузивно образование во ООУ „Сандо Масев“ од Струмица

Секое дете има право на квалитетно образование кое ги почитува и промовира дигнитетот и оптималниот развој на детето. Водејќи се од ова, основното општинско училиште „Сандо Масев“ од Струмица, во соработка со УНИЦЕФ, БРО, Македонскиот центар за граѓанско образование и со поддршка на општина Струмица, се вклучи во проектот „Инклузивно образование на ранливи групи“.Наставниците од одделенска и предметна настава од ова училиште, во работна атмосфера ги реализираа содржините и активностите од модул 1 со наслов „Визија, теорија, концепти“ од инклузивното образование за ранливи групи.

Опфатот на обуката ги насочи учесниците кон активности за влијанието на наставниците за поддршка на учениците, вреднувањето на различноста на учениците, личниот и професионален развој, соработката на ниво на училиште и локална средина и сфаќањето дека инклузивниот наставник треба постојано да ги зголемува и продлабочува своите знаења во текот на својот живот.Со оваа дисеминација се започнува теоретско-програмската структура, која на наставниците ќе им овозможи во исти или слични идни ситуации да ги решаваат идентификуваните проблеми за работа со учениците во доменот на инклузивното образование за ранливи групи. Формираниот инклузивен тим кој ги гради своите искуства преку посебни обуки и практичната работа со учениците е приоритет, кој секако дека ќе вроди плод за подобрување и унапредување на меѓусебните односи на родителите, учениците, наставниците и локалната средина.Со активната поддршка што градоначалникот и Советот на општина Струмица ја даваат за подобрување на условите за работа во воспитно-образовните установи и стручното усовршување на наставниот кадар во областа на инклузивното образование, во наредниот период се очекува и други основни училишта да се вклучат во инклузивното образование за ранливи групи.