Единствената награда за високо актерско остварување на 26-то издание на Фестивалот на камерен театар „Ристо Шишков“ ја доби актерот Благоја Чоревски за улогата на Вилфред Бонд во претставата „Квартет“ во копродукција на Македонскиот народен театар и „Контрапункт“ од Скопје, по текст на Роналд Харвуд, а во режија на Зоја Бузалковска.
Така одлучи меѓународното фестивалско жири предводено од позната српска актерка Тања Бошковиќ. Наградата која што се состои од златен медалјон со ликот на Шишков, плакета и паричен износ од 1.500 евра на Чоревски му ја врачи директорот на фестивалот Ванчо Ристов Патриков. Во петте фестивалски денови на годинашното издание, беа изведени десет претстави во кои настапија актери од Словенија, Босна и Херцеговина, Србија, Бугарија и Македонија. Фестивалот финансиски го поддржаа општина Струмица и Министерството за култура.
