Претседателот на Советот Јосиф Христов им го честиташе приемот на првачињата во Детската организација

Во организација на домот за деца и млади „Благој Јанков Мучето“, денеска, во центарот за култура „Антон Панов“ се одржа свечена приредба по повод приемот на учениците од првите одделенија од основните општински училишта во Детската организација. Приемот им го честиташе претседателот на Советот на општина Струмица, Јосиф Христов кој им порача да бидат горди што се дел од најмасовната, најдобрата и најчистата организација во светот: Интегрален текст од обраќањето на претседателот на Советот, Јосиф Христов:

Деновиве времето е вистинско есенско, облачно и дождливо. Облачно е и денес, но таму каде што има деца има и сонце. Вие сте тоа сонце што не грее, што не топли и што не прави среќни. Се собравме овде на топлината да ви возвратиме со топлина, на светлината да ви возвратиме со светлина, на љубовта да ви вратиме со љубов. Се собравме овде во ваша чест и во чест на денот денешен, бидејќи вие овој ден го заслужувате.За сосема кус временски период вам ви се случуваат два дена кои се паметат цел живот. Еден од тие два дена е секако 1. септември, денот кога за прв пат седнавте во училишните клупи, а вториот ден е токму денешниов, кога сите вие станувате дел од најмасовната организација во светот. Имено, во рамките на ,,Детската недела“ што деновиве се одбележува како низ сите делови на светот така и кај нас, вие како нови првачиња, од денес станувате членови на ,,Детската организација,, .Тоа не е само најмасовната светска организација, туку е и најдобрата и најчистата организација на нашата планета. според добрината што вие ја носите во вашите срца и според чистотата на вашите детски души. Бидете среќни што сте деца. Бидете горди што сте дел од ,,Детската организација“ и бидете свесни дека вие имате свои права кои мора да се почитуваат. Тие ваши права се пропишани со еден важен документ донесен во Обединетите нации кој се вика ,,Декларација за правата на детето“ Долг е списокот на вашите права што ги содржи таа декларација, но во оваа прилика вреди да се истакнат неколку од нив. Тоа се: правото на образование, правото на сопствено мислење, правото на здравствена заштита, правото на дом и семејство, правото на слободно време и игра и многу, многу други. Тие ваши права се наша должност и наша обврска. Ние возрасните мора да ги почитуваме тие ваши права и да создадеме услови за нивно исполнување, затоа што вие сте нашата гордост и радост, затоа што вие сте нашата иднина, затоа што светот останува на децата.На крајот од ова мое обраќање пред вас, сакам да ви ги пренесам поздравите од градоначалникот Зоран Заев, и од негово и мое име, како и од името на Советот на општина Струмица да ви го честитам приемот во ,,Детската организација“ и да ви посакам среќно и безгрижно детство.