Почна поставувањето на вештачката трева на помошното игралиште на стадионот „Младост“

Со поставувањето на вештачката трева градежните активности од првиот дел на помошното игралиште на стадионот „Младост“ во Струмица се во завршна фаза и веќе му го даваат ликот на модерен фудбалски терен. Околу 15 дена ќе трае поставувањето на тревата на игралиштето кое е со стандардни димензии за одржување на натпревари.

Во рамките на првата фаза заврши и оградувањето на целиот терен. Во втората фаза од овој проект планирано е да се направат соблекувална, трибини со капацитет од 200 седишта, а ќе бидат поставени и рефлектори.Овој проект чини вкупно 430 илјади евра, од кои 330 илјади евра се од буџетот на општина Струмица, а 100 илјади евра е донацијата за вештачката трева од УЕФА.