Убеден сум дека така ќе биде и овој пат. Тоа што Струмица е домаќин на ова Државно првенство, воопшто не е случајно. Вие се наоѓате во најодбојкарскиот град во Македонија, во градот кој го има актуелниот и повеќекратниот шампион на Македонија и освојувач на одбојкарскиот куп на Македонија, во градот кој со свои одбојкари ја сочинува половината македонска репрезентација, во градот кој дал средношколци – одбојкари кои го освоиле четвртото место на светското првенство во одбојка за средни училишта и конечно во градот кој бил домаќин на дури три училишни олимпијади. Од името на овој град, од мое лично име и од името на градоначалникот на општина Струмица Зоран Заев, срдечно ве поздравувам и ви посакувам да поминете три незаборавни денови во нашата средина. Во исто време, на шесте средношколските одбојкарски екипи од Скопје, Битола, Тетово, Пробиштип и Струмица кои ги претставуваат трите региони во земјава, им посакувам добри спортски резултати на ова државно првенство. На крајот некој ќе биде прв, некој втор, а некој ќе мора да биде последен. Така е тоа во спортот. Но најважно од се е убавото дружење, нешто кое сите вас ќе ве направи победници. Искрено се надевам дека токму вие ќе ја донесете поубавата иднина на македонската одбојка и дека тоа деновиве ќе успеете на најубав можен начин и да го докажете во оваа спортска сала на СОУ „Никола Карев“, рече Христов.Државното првенство се одржува во организација на Општинскиот сојуз на училишен спорт – Струмица и Федерацијата на училишен спорт на Македонија, а ќе заврши на седми март.